ГЕОЛОГИЙН СУДАЛГАА ШИНЖИЛГЭЭНИЙ ТӨВ ТӨҮГ-ЫН ТӨЛӨӨЛӨГЧИД ОХУ-ЫН ДУБНА ХОТ ДАХЬ ЦӨМИЙН ШИНЖИЛГЭЭНИЙ НЭГДСЭН ИНСТИТУТ-Д ЗОЧЛОВ🇲🇳🇷🇺​

Геологийн судалгаа шинжилгээний төв (ГСШТ) ТӨҮГ, ОХУ-ын Дубна хот дахь Цөмийн шинжилгээний нэгдсэн институт (ЦШНИ) хоорондын хамтын ажиллагааны хүрээнд ГСШТ -ийн захирал Б.Энхтөр, Цөмийн шинжилгээний лабораторийн эрхлэгч Н.Балжинням нар 2025 оны 08 дугаар сарын 11-нээс 15-ны өдрүүдэд тус институтийн Цөмийн Урвалын Лабораторид зочлон, тус лабораторийн Хавсраг судалгааны төв болон Радиоизотопын группийн радиохимийн лабораторийн үйл ажиллагаатай танилцав.

Геологийн судалгаа шинжилгээний төв нь 2009 оноос тус институттэй хамтын ажиллагааг эхлүүлсэн бөгөөд тус институтын Нейтроны физикийн болон Цөмийн урвалын лабораториудтай цөмийн аналитик шинжилгээний арга аргачлал, багаж тоног төхөөрөмж судлах, хамтарсан судалгааны ажил гүйцэтгэх чиглэлээр хамтран ажиллаж ирсэн.

Цөмийн Урвалын Лабораторийн Хавсарга судалгааны төвийн болон лабораторийн удирдлагууд Геологийн судалгаа-шинжилгээний төвийн төлөөлөгчдийг хүлээн авч уулзан, өөрийн лабораторийн үйл ажиллагаа, судалгааны талаар танилцуулсан бөгөөд хамтын ажиллагааны хүрээнд хийгдсэн хамтарсан судалгааны үр дүн болон цаашдын хамтын ажиллагааг өргөжүүлэх боломжийн талаар хэлэлцлээ.

Уулзалтын үр дүнд манай хоёр байгууллагын цаашдын хамтын ажиллагааны талаар харилцан санал бодлоо солилцож “Хүрээлэн буй орчны цацрагийн хяналт”, “Радиохимийн арга аргачлал боловсруулах” чиглэлүүдээр үргэлжлүүлэн хамтран ажиллахаар санал нэгдлээ.