ГЕОЛОГИЙН СУДАЛГАА ШИНЖИЛГЭЭНИЙ ТӨВ ТӨҮГ-ЫН ТӨЛӨӨЛӨГЧИД КАЗАКСТАН УЛСЫН ЦАЦРАГ ИДЭВХИТ МАТЕРИАЛЫН УУРХАЙТАЙ ТАНИЛЦЛАА
Геологийн судалгаа шинжилгээний төв ТӨҮГ-ын захирал Б.Энхтөрөөр ахлуулсан баг 2025 оны 11-р сарын 16 – 20-ны өдрүүдэд Казакстан улсын Катко уурхайд зочилж, тус уурхайн ерөнхий үйл ажиллагаа мөн цацраг идэвхит ашигт малтмал олборлож буй ураны уурхайн лабораторитой газар дээр нь очиж танилцан, туршлага судаллаа.Монгол улсын Засгийн газраас хэрэгжиж буй 14 мега төслийн нэг болох цацраг идэвхт ашигт малтмалыг олборлож, эдийн засгийн эргэлтэд оруулахтай холбогдуулан ураны хүдрийн баяжмалын үйлдвэрлэлийн процессын хяналт, экспортын бүтээгдэхүүний гаалийн хяналт болон хөндлөнгийн хяналтын схемыг боловсруулах, борлуулалтын өртөг тооцох зэрэг үйл ажиллагаанд лабораторийн шинжилгээ чухал ач холбогдолтой юм.
Геологийн судалгаа шинжилгээний төв ТӨҮГ нь Монгол улсын эрдэс баялагийн салбарын ууган байгууллагын нэг бөгөөд төрийн өмчит ганц лаборатори юм.Бид өөрсдийн хүлээсэн үүргийн дагуу Монгол улсаас гарч буй төрөл бүрийн баяжмалд лабораторийн хөндлөнгийн хяналт гүйцэтгэдэг. Иймээс ураны хүдрийн баяжмалын лабораторийн шинжилгээг гүйцэтгэх нь төрийн өмчийн лабораторийн үүрэг юм.
Үүнтэй холбогдуулан бид цацрагийн болон хөдөлмөрийн аюулгүй ажиллагааны стандартад нийцсэн зориулалтын лабораторийг шинэчлэн, техникийн чадавхийг сайжруулах, ураны хүдрийн баяжмал дахь уран болон бусад дагалдах элемент, изотопуудын агуулгыг тодорхойлох шинжилгээний арга аргачлалыг судлан, нэвтрүүлэх, дээжлэлт, тээвэрлэлт, хадгалалтын үеийн аюулгүй ажиллагааг хангах, мэргэшсэн боловсон хүчин бэлтгэх асуудлуулыг шийдвэрлэхээр ажиллаж байна.
Энэхүү бэлтгэл ажлын хүрээнд цацраг идэвхит ашигт малтмал олборлож буй уурхайн лабораторитой газар дээр нь очиж бодитоор танилцан, туршлага судалсан нь бидэнд дээрх шинжилгээний арга аргачлал нэвтрүүлэх, шинжилгээний тоног төхөөрөмжийн сонголт хийх, хөдөлмөрийн болон цацрагийн аюулгүй байдлын хяналтын талаарх ойлголт авах зэрэг мэдлэг, мэдээлэл олж авсан үр өгөөжтэй айлчлал боллоо.
